Tag: argentine

À l’affaccata di e feste di capu d’annu è mentre chì u nostru paese campa una situazione pulitica, sucetale abbastanza pessima, un fattu ghjuntu da u mezu oriente hè venutu à rallegrà appena i nostri cori. Ghjera una dumenica di dicembre, calma, ind’una Corsica chì campa à u ritimu di i mercati nataleschi è di a so ambianza scialata, quandu versi 7 ore di sera u muscu di e frittelle è u rimore di i cuncerti, hà lasciatu a so piazza à u culore russicciu di i fumigènes è un certu fervore in carrughju.  Eccu, L’Argentina hà vintu a finale di a cuppa di u mondu di pettu à a francia dopu à un macciu di guasi 3 ore. Una gioia cumuna hè subbitu schiattata, è u fretu di stagione hè statu rimpiazzatu da un bullore pupulare. S’hè  cumminciatu à fà festa nu i  carrughji di parechje ville di Corsica chì si sò ammantate tandu di i culori di l’Albiceleste, e trumbate di e vitture anu ribumbatu per i quartieri, è centinaie di parsone si sò addunite  nant’à a traversa di Bastia è d’astri lochi di l’isula, fendu sventulà bandere è sciarpe Argentine è cantendu à voce rivolta canzone in umagiu à e legende « Diego Maradona », « Messi », l’Argentina in generale è dinù per ùn dispiace ci, qualchì cantu per stuzzicà appena a pupulazione di u paese amicu. Una stonda festosa è scherzoza cum’elle ci piacenu. Dopu à sta passata più chè sebbiata, a seguita s’hè passata nant’à a tela, soprattuttu per via di e rete suciale, induve emu vistu abbastanza in furia assai videò è fottò di a Corsica in traccia di festighjà a disfatta di a francia, perchè chì ch’ella piacessi o micca à certi, s’hè festighjatu prima di tuttu a scunfitta di a francia. A stampa naziunale francese hà ripigliatu assai l’infurmazione  cù un disprezzu forte, cum’è s’ellu ci fussi statu qualcosa di strazurdinariu. Ognunu sà chì ghjè un usu abbastanza cunnisciutu è universale, quandu u paese duminante perde, u paese duminatu vince. Forse certi ghjeranu sustenidori di l’argentina per cagione  chì rimandanu solu à un aspettu spurtivu, ma stu slanciu pupulare è stu riflessu naturale, spuntaneu avianu una versura pulitica senza dubbità ne. Ùn ci hè vulsutu ad aspettà tantu per vede spuntà appena inghjilocu nant’à e rete una mossa di razzisimu di pettu à i corsi,  emu ritruvatu e cacciate tradiziunale, chì anu sempre a pretenzione d’amparà ci a vita, chì provanu di fà crede à a ghjente chì senza a pastoghja francese seriamu pocu affari. Ma frà tutte l’inghjulie s’hè vistu parechje volte, una certa infrasata « il faut les renvoyer chez eux ». Tandu ci vulerebbe chì a pupulazione di francia capisca, chì prima stu mottu ind’u nostru casu ùn viaghja micca è chì ancu s’ella a sà digià, ùn feremu risparmiu à ripete la, chì a sola pupulazione di dirittu nantu à a terra di corsica sò i corsi è chì u scopu ferma u listessu,  cum’è l’hà fatta l’Albiceleste, si cercherà sempre à mette A FRANCIA FORA.