Month: octobre 2020

Antone Acquaviva fù un giurnalistu di prima trinca, è da « Ce soir » d’Aragon à « U Ribombu », passendu da « l’humanité », messe sempre a so piuma è i so talenti di scrittore à u serviziu di a causa chì li paria a più ghjusta. Ma, da e machje di u Morvan à a Lotta di Liberazione Naziunale di u nostru populu, ghjè statu dinù un cumbattente di a libertà, l’eternu resistente chì s’hè sempre rivultatu contr’à tutte l’inghjustizie fatte à u so populu, è à l’Umanità sana. Micca solu cù e so parolle , o i so scritti luminosi, ma dinù incù l’atti diterminati di l’omu senatu è curagiosu ch’ellu era. Fermerà per u sempre à fianc’à noi, è u so esempiu guiderà i nostri passi sin’à a vittoria. Quella di una Corsica libera è fraterna.