Month: mars 2023

Da Sant’Anghjuli in punta è da Fium’altu à Golu, ghjeranu custì e so loche, in sta pieve di Casinca, in u so paese in alpellatu di Loretu induv’ellu era natu in u 1940, ind’u veculu d’una sucetà impastata di cursitù naturale. Ghjè forse st’ambiu custì chì darà u versu à a so andatura d’omu, di militante è pueta più tardi. Forse ghjè à mezu à e ricciate è i casali di u paese, à l’aggrottu di a tozza, ma sempre cù sta vista di punta, stu balcone naturale, chì si spalanca annant’à l’immensità azuru di u Mediterraniu, è di l’Altrò. Chì u so estru, u so gharbu s’hè fattu. Ghjuvanteramu Rocchi, ghjè un nome, una statura, un parcorsu, chì per ogni corsu primurosu di a so lingua, a so cultura dicia assai. Tantu l’impegnu chì ghjera soiu mentre guasi un mezu seculu fù impurtante. È oghje, cinque anni dopu a so morte, a so lascita ferma tremenda. Era unu di i pilastri di a leva di u settanta è di l’andatura di u riacquistu, è s’ellu si dice vulinteri chì ogni petra face muru, a soia, quella ch’ellu ci hà arricatu, ghjè una petra maestra, quella callaghja ch’hà pussutu tene arrittu u muru culturale d’una civilizazione chì periculava, quandu chì solu una manata di parsone si n’era accortu è si ne primurava. A so opera, u s’impegnu, senza dubbità ne anu participatu à fà chì simu ghjunti à salvà oghje, un palmu di ciò chè no simu, ciò chì ci face esse corsi in a diversità di stu mondu. Ghjè à lu fà di l’anni settanta, ind’u bullore puliticu è culturale chì nascia in Corsica, cù sta brama cullettiva di ripiglià e briglie di a nostra sucetà tradiziunale chì si ne partia in pappina, cù una mossa culturale è una vulintà forte di riacquistà i diritti naziunali di stu populu nigatu chè n’eramu, chì tandu ellu, ùn hà tricatu per insulcà u so passu à mezu, è mette sì à capu d’affari di tutte e mamme nant’à u tarrenu. Cù a so pedagogia d’insignante, u so militantisimu sputicu, prima hà cuminciatu à cumbriculà una sculuccia d’estate in u so paese, induve era insignatu u corsu, pò à scumbattutu cù d’astri mentre l’università d’estate di Corti. Era dinù di manu cù parechji scrittori nu a rivista Rigiru, chì ghjera tandu u fanale literrariu di l’epica, è pò di sicuru, per via di e so produzzione di scritti indiati chì sò stati per u più cantati, chì ci ribombanu sempre d’oghje cum’è tante chjame di rivolte, è chì rispechjavanu tante rivindicazione : Simu Sbanditi, Vince per un more, I Mufrini, Quale serà, Scelta para, Anu da vultà è tira avanti è dalli. Una musa chì mettia à palesu e brame di una generazione sana, e difficultà campate da una sucetà, i guai è e speranze d’un populu. Ma s’ellu impennava ghjera per un certu piacè, ghjè vera, ma soprattuttu per u bisognu, per u cumbattu d’una vita, quellu à prò di a lingua chì fù u filu mai rottu chì accumpagnò a so dimarchja d’omu è militante fin’à l’ultimi fiati di a so vita. A so primura ghjera di tramandà la, da ch’ella ùn smarisca mai è per quessa, chì ci fussi statu di megliu chè i zitelli, a giuventù per dalli un avvene ? elli, a rileva naturale d’un populu, u so lindumane. Ma in quelli primi tempi di u riacquistu, fora di qualchì nanna chjappa da custì è culà ùn ci era guasi nunda per fà una prima avvicinata di u corsu versi i zitelli, è ci hè vulsutu à inventà, creà, pruduce, è ghjè custì ch’ellu hà cuminciatu à scrivacciulà e so puesiole, fillastrocche da pudè accumpagnà in corsu i primi tempi di u campà, prima nu e riviste, è dopu ci sò stati travagli più apprunfunditi cù u CRDP di Bastia, è dinù cù a so participazione à a pruduzzione di i dischetti Aiò è Campemuci è più tardi Brame Zitelline, Girasole. Ci hè statu dinù sta prova d’un annu d’una sculuccia guasi clandestina ind’u so appartamentu di Bastia. Di fatti mettia in viaghju tutti i mezi pussibuli da salvà è tramandà. Per pudè mette in ballu una vera pulitica à favore di u corsu, dopu ad avè participatu à elaburà l’appoghji pedagogichi è diddattichi, è dà si di rimenu appressu à una mansa di capatoghji nant’à u tarrenu, ùn s’hè mai scartatu di u so solcu d’insignante, da ch’ellu avia una fede tamanta ind’a scola per pudè inghjennà i lucutori di dumane. Hè statu inisignante, cunsigliere pedagogicu in lingua corsa, cunsigliere tennicu di l’inspettore d’accademia, cù sempre u listessu scopu : fà di a scola un puntellu eccenziale di l’amparera di u corsu. À quelli ch’ùn anu mai stanciatu di rimbiccà chì u corsu ùn s’amparava micca in scola, ellu dicia vulinteri « s’ellu ùn s’era micca insignatu u Corsu à a scola quale hè pò certificà oghje ch’elli ci serianu tutti sti giuvanuttoni, babbi di famiglia, è chì oghje trasmettenu u corsu à i so figlioli, ch’averianu pussutu fà la ? » A so più bella vittoria, forse, ferma ind’u so paese di Loretu. Ghjè sicuramente à i tempi d’oghje unu di i lochi di Corsica, induve u nivellu di cursufunia hè unu di i più alti, a so salvezza hè assicurata. Da a prima prova di scola corsa in l’annate settanta, à u centru immersivu è a scola publica bislingua, à quale s’aghjunghje una tramandera naturale di leva in purleva ch’ùn s’hè mai piantata, a lingua in stu lucale, ghjè una realità campata tutti i ghjorni, l’usu naturale d’ogni paisanu. Infine, di sicuru, a stampa eterna ch’ellu ci hà lacatu ferma nu i so scitti, a diciamu à principiu a so lascita, a so opera sò tremende, chì a prosa di ghjuvanteramu Rocchi ognunu a pudia fà soia, ereda di a sistina d’ottunarii tradiziunale, u so versu paisanu pupulare ci cuntava di manera linda è pura ind’un corsu schiettu induve daretu ogni parulla affaccava una fiura per dì ogni sintimu di u campà è l’intimu di l’esse. Sta lingua in punta di a lingua, a so lingua materna si ne ghjuvava per cuntà ci i frastorni, i turmenti d’ognunu, qual’hè ch’ùn hè statu toccu à u più prufondu di sè stessu, da stu zitellettu in cerca di risposte chì ci dice Quantu ci manca lu passu di quellu chì ghjè quallà, o stu maritu addisperatu chì brama l’amore persu è stu scalone chì pare un nidu chì s’anu lasciatu l’acelli, o l’amore felice è e prime stonde incante, i primi sguardi d’amore, ci cuntava quant’ella era bella a nostra cursichella, ramintendu ci e so stonde, ‘sse passate di a nostra storia cumuna da e prove di Sampieru, È di Sambucucciu d’Alandu è Paoli l’Altieru à MarcuMaria è di lu tempu lu tagliolu chì ci dice ancu lu ventu libertà, Libertà sempre. Ci simu fatti, senza vulè la, senza sapè la, cù i so scritti, u so stintu, simu crisciuti, ingrandati à latu à ellu da criaturi, giuvanotti, militanti o simplici passiunati di cantu, ci hà fattu sparte l’amore di sta lingua, stu paese, sta ghjente, à affiancatu e nostre lotte. L’ultime annate di a so vita cuntinuava à avvià prugetti cù i ghjuchi, i grandi, i prufessiunali è ogni cristianu chì li dumandava. Ma ancu puru essendu statu un omu d’un impurtanza maiò per a Corsica muderna, ricunnisciutu da i so pari ch’ellu era, hè firmatu u listessu, un omu discretu impastatu di cursitù à l’anima paisanesca, baretta incalfata è u so bleu azzingatu à a spallera, battia a so piana di Loretu sempre in cerca d’ operà per u megliu pussibule, per a so giuventù, u so paese, pigliendu pratesa per ogni causa chì li paria ghjusta. Omu dice à spessu chì a vita ghjè un affaccata à u balcone, ma di quessa affacata omu si n’arricorderà una stonda, chì di Ghjuvanteramu, sò cinque anni avà, è eternità serà. Lisandru