U ferraghju maladettu
Hè vultatu à malannu
È di l’omu predilettu
A sorte manda luntanu
Ver’di l’orizonte tetru
i stu statu scimittanu

Si sà chì via battuta
Hè di strapazzu foltru
Ma ogni vita crisciuta
Di sintimu patriottu
Hè di fede inchjuccuta
D’estru forte è mai toltu

Puru a s’anu pruvata
Di cusì brutta manera
D’un capu una ghjimbata
D’avant’à forza strangera
Ma ùn ci hè porta schjattata
Per smatt’a ghjente sincera

Un chjassu oghje sguaiatu
È st’anima chì ci manca
Di stu tempu tribbulatu
Cirnea si face stanca
È brama à lu serratu
A stagione chì spalanca

Ora sò foschi i to muri
È si ne trica veranu
Soca quì simu sicuri
È più prestu veneranu
L’Orli d’i tempi futuri
Chì di Libertà seranu

Lisà