Salute à tutti,ùn sò di quelli chì si sprimenu nant’à e rete suciale ma per sta volta mi tocca à cuntà.
M’hè accadutu sta mane un affare chì forse, vi darà à riflette nant’à u diventà di u nostru populu.

Eccu la quì : Appena compia una messa d’interru in Lupinu, in chjesgia Nôtre Dame des Victoires, un prete, Thomas Brenti, tuttu di neru è capigrisgiu ( à dilla franca, pallisà lu cusì mi sentu peghju ch’una camisgia nera ) ma vi pregu di purtà un occhjata à lu mio scrittu.

Tandu u sgiò curà hè ghjuntu à fà u criticone apressu à i cantatori chì, for’ d’esse l’ultimi di Mohicans à avè amparatu à cantà a messa à modu nostru, cun versi chì sò e radiche stesse di a nostr’identità, artisgiani di a lingua, è, per una parte, cunfratelli, chì anu accunciatu u spartitempu di travagliu per rende un ultim’ umaghju à un alma cristiana in lu so passu à l’eternu, anu fattu l’offese tremenda d’avè rispostu “ incù u vostru spiritu “ invece di “et avec vôtre esprit”, d’avè pregatu u Pater Noster in lingua corsa per via di “ l’unité dans la célébration de la foi “ à colpu di  “ Lorsque je parle français vous devez répondre en français”  eccu à chì ne simu: in l’annu 2023 di u calendariu Cristianu, pregà fendu usu di a lingua materna hè diventatu oramai un rimprovu…. Pocu schjaffu !

Una manera di pensà, un discorsu, ch’ùn hà nunda à chì fà in e nostre chjesgie.

A saperà quest’omu di Diu chì ognunu hè liberu di pregà u Signore in a so lingua ? Ch’ella sia Corsa, Catalana, Basca, Sarda, Irlandese, kanak, Gallurese,Uccitana, Brittonia, Inglese …. è ancu Francese !  Forse s’hè fattu un brocciu, smintinchendu a so lingua cum’è ellu s’hè scurdatu di a filetta è averà intesa una forma di glossolalia …..

Mi scuserete aghju scrittu in corsu …

Perdono mio Dio
Perdono Pietà
Pietà

P C